काठमाडौं- लगातार उकालो लाग्दै दिनहुँजसो नयाँ रेकर्ड बनाइरहेको सुनको मूल्य आइतबार पनि बढेको छ।
गएको साता लगातार तीन कारोबारमा उच्च मूल्यमा पुगेर शुक्रबार ओरालो लागेको सुनको यो साता पहिलो कारोबार दिन नै प्रतितोला दुई हजार ९ सय रूपैयाँले बढेर पुन: कीर्तिमानी बिन्दुमा पुगेको छ।
आइतबारका लागि छापावाल सुनको मूल्य प्रतितोला एक लाख ३५ हजार ६ सय रूपैयाँ तोकिएको छ भने तेजाबी सुनको मूल्य प्रतितोला एक लाख ३४ हजार ९ सय ५० रूपैयाँ कायम रहेको नेपाल सुनचाँदी व्यवसायी महासंघले जनाएको छ।
गएको साता पाँच दिनमा चारहजार रूपैयाँले बढेको सुनको मूल्य शुक्रबार भने प्रतितोला एक हजार ३ सय रूपैयाँले घटेको थियो। बिहीबार सुन हालसम्मकै उच्च प्रतितोला एक लाख ३४ हजार रूपैयाँमा कारोबार भएको थियो।
चाँदीको मूल्य पनि आज बढेको छ। महासंघका अनुसार गएको शुक्रबारको तुलनामा चाँदी आज तोलामा ५५ रूपैयाँले बढेर प्रतितोला एक हजार ६ सय ७० रूपैयाँमा कारोबार भइरहेको छ।
