काठमाडौं- स्थानीय बजारमा सुनको मूल्य प्रतितोला १ हजार ३ सय रुपैयाँले ओरालो लागेको छ। लगातार उकालो लागेको सुनको मूल्यमा आज भने गिरावट देखिएको हो। 

नेपाल सुनचाँदी व्यवसायी महासंघका अनुसार आज छापावाला सुनको मूल्य प्रतितोला १ लाख ३२ हजार ७ सय रुपैयाँ निर्धारण भएको छ। बिहीबार छापावाला सुन प्रतितोला १ लाख ३४ हजारमा कारोबार भएको थियो।

यस्तै तेजाबी सुन पनि तोलामा १ हजार ३ सय रुपैयाँले ओरालो लागेको छ। बिहीबार प्रतितोला १ लाख ३३ हजार ३ सय ५० रुपैयाँमा कारोबार भएको तेजाबी सुन आजका लागि भने १ लाख ३२ हजार ५० रुपैयाँ निर्धारण भएको हो।

यसैगरी चाँदीको मूल्यमा पनि सामान्य गिरावट आएको छ। महासंघका अनुसार चाँदीको मूल्य आजका लागि प्रतितोला १ हजार ६ सय १५ निर्धारण भएको छ।

बिहीबार चाँदी प्रतितोला १ हजार ६ सय ५० रुपैयाँमा कारोबार भएको थियो। यस आधारमा चाँदी तोलामा ३५ रुपैयाँले घटेको छ।