काठमाडौं- केन्द्रीय तथ्यांक कार्यालयका सचिव तोयम राय महालेखापरीक्षकमा सिफारिस भएका छन्।

आइतबार बिहान बसेको संवैधानिक परिषदको बैठकले सचिव रायलाई महालेखापरीक्षकमा सिफारिस गरेको हो।

गत जेठ ८ गते तत्कालीन महालेखा परीक्षक टंकमणि शर्मा सेवानिवृत्त भएपछि उक्त पद रिक्त रहेको थियो।

रिक्त रहेको महालेखा परीक्षकमा १५ जनाले आवेदन दिएका थिए। जसमा गोपिनाथ मैनाली, शिशिर ढुंगाना, रामप्रसाद थपलिया, रामशरण पुडासैनीलगायतले आवेदन दिएका थिए। यस्तै शंकर खरेल, रामनाथ कुँवर, बामदेश बर्मा अधिकारी, महेश्वर काफ्ले, चन्द्रकान्त भण्डारी, वैकुण्ड अधिकारी, सुवोधलाल कर्णले पनि आवेदन दिएका थिए।

प्रतिस्पर्धीमध्येबाट सचिव रायको नाम बैठकले सिफारिस गरेको हो। रायको सचिवको कार्यकाल आगामी भदौबाट सकिँदैछ।

राय विष्णु पौडेल अर्थमन्त्री हुँदा अर्थसचिव भएका थिए। उनी सचिवमा बढुवा भएसँगै बागमती प्रदेशको प्रमुख सचिव, अख्तियार दुरुपयोग अनुसन्धान आयोग र उद्योग वाणिज्य मन्त्रालय बसेर काम गरिसकेका छन्।