काठमाडौं- अवैधरुपमा विदेश लैजान लागिएका विदेशी मुद्दासहित तीन जना पक्राउ परेका छन्।

नेपाली मुलका क्यानेडियन नागरिकहरू ५१ वर्षीय पेमा दोर्जे दोथार, ३४ वर्षीय तेन्जिङ देलेक र नेपाली नागरिक ७२ वर्षीया नग्‍वाङ पाल्मु लामालाई प्रहरीले बुधबार दिउँसो त्रिभुवन विमानस्थलबाट पक्राउ गरेको हो।

इण्डिगो एयरलाइन्सको उडानद्वारा काठमाडौंबाट दिल्ली हुँदै क्यानडा जान लागेका उनीहरूलाई त्रिभुवन विमानस्थलमा चेकिङ गर्ने क्रममा ह्यान्ड ब्यागमा विभिन्न दरका गरी २७ हजार ४ सय २८ अमेरिकी डलर, १ हजार ४ सय ८० क्यानेडियन डलर र नेपालमा प्रतिबन्धित भारतीय रूपैयाँ ५५ हजार फेला पारी तीनै जनालाई पक्राउ गरिएको प्रहरीले जनाएको छ।

उनीहरूलाई आवश्यक अनुसन्धान तथा कारबाहीका लागि राजस्व अनुसन्धान विभाग हरिहरभवन पठाइने प्रहरीले जनाएको छ।