काठमाडौं- विभिन्न वित्तीय तथा इन्स्योरेन्स कम्पनीहरूमा नेपाल राष्ट्र बैंकका गभर्नर महाप्रसाद अधिकारीको २७ हजार १ सय ८४ कित्ता साधारण सेयर (आईपीओ) रहेको छ।
गर्भनर अधिकारीले आफ्नो सम्पत्ति विवरण सार्वजनिक गर्दा ११ वाणिज्य बैंकसहित विभिन्न वित्तिय संस्थामा उनको उक्त सेयर रहेको देखिएको हो।
त्यस्तै हाइड्रो पावर कम्पनीमा दोस्रो बजारबाट २७ हजार ९ सय २९ कित्ता सेयर खरिद गरेको समेत उल्लेख गरिएको छ।
उनको श्रीमती सरिता अधिकारीको नाममा म्युचुअल फन्डमा १ लाख ८० हजार कित्ता सेयर रहेको छ।
गभर्नर अधिकारीले छोरा र श्रीमतीको नाममा १० स्थानमा जग्गा रहेको समेत विवरणमा उल्लेख गरेका छन्। झापामा ३ बिघा, ललितपुरमा १२ रोपनी, मकवानपुरमा २ कठ्ठा जग्गा रहेको छ। उनको २७ तोला सुन र ५० तोला चाँदीका गहना रहेकोसमेत विवरणमा राखिएको छ।
गभर्नर अधिकारीले नबिल बैंकमा २ हजार ३ सय डलर बचत रहेको समेत उल्लेख गरेका छन्। त्यस्तै ३ वाणिज्य बैंकमा १ लाख ६३ हजार ७ सय ६२ रुपैयाँ बचत रहेको छ। त्यस्तै नागरिक लगानी कोषमा १२ लाख २४ हजार रुपैयाँ बचत रहेको छ। उनीसँग मोटरसाइकल र एउटा टोयटाको कारसमेत रहेको उल्लेख गरेका छन्।
