काठमाडौं- मंसिर महिनामा पनि बैंकहरूमा निक्षेप बढ्ने छाँट देखिएको छैन। नेपाल बैंकर्स संघले दिएको तथ्यांकअनुसार वाणिज्य बैंकहरूको मंसिर महिनामा १२ अर्ब निक्षेप घटेको छ। मंसिर २४ गतेसम्मको तथ्यांकअनुसार ऋण प्रवाह भने ४२ अर्ब रुपैयाँ भएको छ।
वाणिज्य बैंकहरूमा कात्तिक ३० गतेसम्म ४२ खर्ब ३३ अर्ब निक्षेप रहेकोमा मंसिर २४ मा आइपुग्दा ४२ खर्ब २१ अर्ब रुपैयाँ मात्रै रहेको छ। तर ऋण प्रवाह भने कात्तिक ३० गतेसम्म ४० खर्ब ३४ अर्ब रहेकोमा मंसिर २४ सम्म ४० खर्ब ७७ अर्ब रुपैयाँ पुगेको छ।
चालु आर्थिक वर्षको निक्षेप जम्मा २० अर्ब रुपैयाँले मात्र बढेको छ। तर भने ऋण ३ खर्ब ५६ अर्ब रुपैयाँले वृद्धि भएको छ। निक्षेप घट्ने तर ऋण बढ्ने हुँदा बैंकहरूको सीडी रेसियो औषतमा ९१.४९ प्रतिशत पुगेको छ। पछिल्लो सातामा मात्र निक्षेप ५ अर्बले घटेको छ।
मंसिर १७ गतेसम्म ४२ खर्ब २६ अर्ब रुपैयाँ निक्षेप संकलन गरेकोमा २४ गतेसम्म आइपुग्दा ५ अर्ब रुपैयाँले घटेर ४२ खर्ब २१ अर्ब रुपैयाँ पुगेको छ।
संघका अनुसार एक साताको अवधिमा कर्जाको माग ८ अर्ब रुपैयाँले बढेको छ। मंसिर १७ गतेसम्म ४० खर्ब ६९ अर्ब रुपैयाँ कर्जा प्रवाह भएकोमा एक साताको अवधिमा कर्जाको माग ८ अर्ब रुपैयाँले बढेर ४० खर्ब ७७ अर्ब रुपैयाँ पुगेको छ।
