काठमाडौं- राष्ट्रिय योजना आयोगले यही वर्ष ११ प्रतिशतले बढेर प्रतिव्यक्ति आय १३ सय २२ अमेरिकी डलर पुग्ने अनुमान गरेको छ। 

मध्यकालीन खर्च संरचनामा आयोगले यस्तो अनुमान गरेको छ। गत वर्षको तुलनामा ११.०६ प्रतिशतले वृद्धि हुने आयोगको अनुमान छ। गत वर्षसम्म नेपालीको प्रतिव्यक्ति आय ११ सय ‍९६ अमेरिकी डलर रहेको आयोगकको अनुमान छ। 

तीन वर्षपछि नेपालीको प्रतिव्यक्ति आय १५ सय ९५ डलर पुग्ने अनुमान गरिएको छ। 

अर्थतन्त्रका अन्य सूचकहरूमा आर्थिक जोखिम अहिले २४.२ अंक रहेकोमा तीन वर्षपछि २३ अंकमा सीमित हुने र मानव सम्पत्ति सूचक ७५ बाट बढेर ७८ पुग्ने आयोगले अनुमान गरेको छ। 

चालु वर्ष आर्थिक वृद्धिदर भने ६.५ प्रतिशतमै सीमित हुने आयोगको अनुमान छ। यद्यपी यो अनुमान अघिल्लो वर्षको तथ्यांकमा आधारित रहेर गरिएको हो। सरकारले बजेटमा भने ७ प्रतिशतको वृद्धिदरको लक्ष्य लिएको छ। 

आगामी तीन वर्षमा कूल सार्वजनिक खर्च ५४ खर्ब ३८ अर्ब हुने यसमा १२ खर्ब  पुँजीगत खर्च हुने प्रक्षेपण गरिएको छ।