काठमाडौं- अनलाइन क्यासिनो गेम खेलाएको अभियोगमा प्रहरीले चार जनालाई पक्राउ गरेको छ।

क्यास एपलगायतका एप्लिकेसनमार्फत हारजित हुनेगरी अनलाइन क्यासिनो गेम खेलाएको भन्दै प्रहरीले काठमाडौं बस्ने काभ्रेकी २६ वर्षीया सरिता लामा, सिन्धुपाल्चोककी २५ वर्षीया सारंगा गुरुङ, खोटाङकी २३ वर्षीया पूर्णीमा राई र नुवाकोटका २८ वर्षीय तेम्बा लामालाई आइतबार पक्राउ गरेको हो।

विभिन्न खेलहरूमा अनलाइनमार्फत बाजी राख्दा जितिन्छ भन्ने विश्वास दिलाएर सट्टेबाजी गराइ खेल खेलाएको भन्ने सूचनाका आधारमा अनुसन्धानमा खटिएको प्रहरीले उनीहरुको साथबाट अनलाइन गेम खेलाउन प्रयोग भएका ल्यापटप ५ थान र मोबाइल ११ थान बरामद गरेको छ।

उनीहरूलाई आवश्यक कारबाहीको लागि जिल्ला प्रहरी परिसर टेकु काठमाडौं पठाइएको प्रहरीले जनाएको छ।