काठमाडौं- सिमेन्ट निर्यातमा उत्साह देखिएको छ। नेपालबाट अहिले भारततर्फ अर्घाखाँची, पाल्पा, सर्वोत्तमलगायतका उद्योगले सिमेन्ट निर्यात गरिरहेका छन्।

चालु आर्थिक वर्ष  २०८०/०८१ को ८ महिना साउनदेखि फागुनसम्ममा नेपालबाट भारततर्फ २ अर्ब ४७ करोड १७ लाख ४२ हजार रुपैयाँको सिमेन्ट निर्यात भएको छ।

भन्सार विभागले सार्वजनिक गरेको तथ्यांकअनुसार २२ लाख ९६ हजार ९ सय ७३ टन सिमेन्ट तथा क्लिङकर भारत निर्यात भएको छ। सिमेन्ट निर्यातमा सरकारले अनुदान दिने घोषणासँगै सिमेन्ट निर्यातमा उत्साह सुरु भएको हो।

व्यवसायीले अहिलेसम्म गत आवको सिमेन्ट निर्यातबाट पाउनुपर्ने अनुदान तथा छुटहरू पाएका छैनन्। सरकारी तवरबाट पहिले विगतका पुरानो बाँकी रहेकाहरूलाई निर्यात अनुदान दिएपछि मात्रै सिमेन्ट उद्योगीले अनुदान तथा छुट पाउने  बताइएको छ। 

सरकारले अनुदात फिर्ताको कार्यविधि बनाएपनि कार्यान्वयनमा आएको छैन। व्यवसायीले अहिले अनुदान रकम पाउने आशामै उधारोमा सिमेन्ट निर्यात भइरहेको छ।

जतिसक्दो छिट्टो अनुदान फिर्ताको निर्णय कार्यान्वयनमा जान्छ त्यति निर्यातमा उत्साह हुने उद्योगीहरूको तर्क छ।