काठमाडौं- चालु आर्थिक वर्ष २०८०/०८१ को साउनदेखि फागुन मसान्तसम्मको ८ महिनाको अवधिमा ६ हजार ४ सय ३५ वटा विद्युतीय कार आयात भएको छ।

भन्सार विभागले सार्वजनिक गरेको तथ्यांकअनुसार ८ महिनामा ६ हजार ४ सय ३५ वटा विद्युतीय कार आयात भएको हो।

उक्त आयातमा १५ अर्ब ८१ करोड ९७ लाख ६० हजार रुपैयाँ बाहिरिएको छ। यो अवधिमा उक्त कार आयात हुँदा सरकारले ६ अर्ब ९९ करोड २६ लाख रुपैयाँ राजस्व आम्दानी गरेको छ। 

५० किलोवाटसम्म चीनबाट ६ सय ६४, भारतबाट २ हजार ४८, इन्डोनेसियाबाट ३४ वटा आएको छ।  

५१ देखि १ सय  किलोवाटसम्म चीनबाट ३२ सय ६० वटा, भारतबाट ३ सय ३२, कोरियाबाट ३ वटा आयात भएको छ। 

१०१ देखि २ सय किलोवाटसम्म चीनबाट २९, जर्मनीबाट ६, कोरियबाट ४० वटा विद्युतीय कार आयात भएको छ। 

२०१ किलोवाटभन्दा माथिका चीनबाट १६, जर्मनीबाट १ वटा, अमेरिकाबाट २ वटा विद्युतीय कार आयात भएको हो। 

हाल नेपाली बजारमा चीन र भारतबाट ठूलो संख्यामा विद्युतीय कार आयात भइरहेको छ। १ सय किलोवाटसम्मका विद्युतीय कारको आयात सबैभन्दा धेरै छ भने अमेरिका तथा जर्मनीबाट पनि नेपाली बजारमा विद्युतीय कार आयात भइरहेका छन्। 

सरकारले आईसी इन्जिनयुक्त कारको तुलनामा विद्युतीय कारमा कर सहुलियत दिएकाले विद्युतीय कारको आयात तथा बिक्री बढ्दै गइरहेको छ।