काठमाडौं- नेपाल प्रहरीको केन्द्रीय अनुसन्धान ब्युरो (सीआईबी) ले कर्जा दुरुपयोगको विषयमा अनुसन्धान गर्दै थुनामा राखेको १० जना बैंकर हाजिर जमानीमा थुनामुक्त भएका छन्। 

कर्जा दुरुपयोग गरेको आरोपमा तत्कालीन सेञ्चुरी कर्मसियल बैंकका पूर्वसीईओ, डीसीईओसहित १० जना कर्मचारीलाई गत फागुन १५ गते प्रहरीले पक्राउ गरेको थियो। उनीहरूलाई अनुसन्धानको लागि १७ दिन थुनामा राखेर अहिले हाजिर जमानीमा छाडेको हो। 

अदालतबाट आइतबारसम्म थुनामा राख्न पाउने म्याद पाएको भएपनि अनुसन्धान लामो चल्ने भएपछि बैंकरलाई हरेक दिन सीआईबी उपस्थित हुने गरी हाजिरी जमानीमा थुनामुक्त गरिएको सीआईबीले जनाएको छ। 

यस विषयमा प्रहरीले बैंकिङ कसुर तथा सजाय ऐन, २०६४ बमोजिम अनुसन्धान गरिरहेको छ।

सीआईबीले देउराली सहकारी संस्थाका सञ्चालक रबिन्द्र चौलागाईंलाई तत्कालीन सेञ्चुरी बैंकले कर्जा दिँदा कर्जा दुरुपयोग गरेको अभियोग लगाउँदै कर्जा प्रवाह प्रक्रियामा संलग्न बैंकका सबै कर्मचारीलाई प्रक्राउ गरेको थियो।