काठमाडौं- नेपाल बिजनेस एसोसिएसन कतारकाे प्रमुख सल्लाहकारमा युवा उद्यमी प्रवीण गुरूङ नियुक्त भएका छन्।

नेपाल व्यवसायी संघको प्रमुख संरक्षकमा कतारस्थित नेपाली राजदूतावासका राजदूत डा. नरेशविक्रम ढकाल र प्रमुख सल्लाहकारमा गैरआवासीय नेपाली संघका उपमहासचिव एवं कतारका सफल व्यवसायी गुरुङ मनोनित भएका हुन्।

करिब २ दशकदेखि कतारमा रहेर विभिन्न व्यवसाय सफलतापूर्वक सञ्चालन गरिरहेका गुरूङ यसअघि एक कार्यकाल संघकाे सल्लाहकार रहिसकेका छन्। अहिले नियुक्त सल्लाहकारकाे अवधि आगामी ४ वर्ष अर्थात् सन् २०२८ सम्मकाे हुनेछ।

संघको २०२४-२८ कार्यकालका लागि नवनिर्वाचित कार्यसमितिको दोस्रो पूर्ण बैठकबाट सोही कार्यकालका लागि ढकालको संयोजकत्वमा संरक्षक समिति र गुरुङको संयोजकत्वमा सरल्लाहकार समिति गठन गरिएको हो।

संरक्षक समितिको सदस्यहरुमा डा. देवकाजी डंगोल, बद्रीप्रसाद पाण्डे र समिर मास्के रहेका छन् भने सल्लाहकार सदस्यहरुमा सागर नेपाल, प्रोफेसर मोहम्मद रमजान मिया (कानुनी), ई. अर्जुन भट्टराई, विकास प्रसाई, परशुराम दाहाल, धनबहादुर बलायर र होमनाथ शर्मा छन्।

कतारलाई व्यवसायिक कर्मथलो बनाइ राष्ट्रिय तथा अन्तर्राष्ट्रियस्तरमा ख्याति प्राप्त व्यक्तित्वहरुलाई समेटेर संरक्षक तथा सल्लाहकार समिति गठन गरको संघले कतार सरकारमा रजिष्ट्रर भई मान्यता प्राप्त पहिलो र एक मात्र सामाजिक संस्थाका रुपमा आफूलाई स्थापित गरेको छ।

नेपाल सरकारसँग समेत एमओयू गरी आधिकारीकता प्राप्त गरेको संघले नेपालमा भएका विभिन्न दैविक प्रकोपलगायत विविध क्षेत्रमा सामाजिक कार्य गर्दै आएको छ भने विभिन्न व्यवसायीक परियोजनासहित दीर्घकालीन योजनाहरुलाई समेत तीव्रता दिएको संघका अध्यक्ष महेन्द्र प्रसाद चम्लागाईँले जानकारी दिए।