काठमाडौं- अघिल्लो सातायता लगातार बढिरहेको सुनको मूल्य दुईदिनयता भने स्थिर रहेको छ। आइतबार उच्च बिन्दुमा पुगेर सोमबार स्थिर रहेको सुनको मूल्यमा मंगलबार पनि घटबढ नभएको नेपाल सुनचाँदी व्यवसायी महासंघले जनाएको छ।
मंगलबारका लागि नेपाली बजारमा छापावाल सुनको मूल्य प्रतितोला एक लाख २६ हजार र तेजाबी सुनको मूल्य प्रतितोला एक लाख २५ हजार चारसय रूपैयाँ तोकिएको छ। सुन आइतबार र सोमबार पनि सोही मूल्यमा कारोबार भएको थियो।
आइतबार प्रतितोला पाँच रूपैयाँले बढेर सोमबार स्थिर रहेको चाँदीको मूल्य भने मंगलबार पुन: बढेको छ। महासंघका अनुसार प्रतितोला १० रूपैयाँले बढेर चाँदी आज प्रतितोला एक हजार चारसय ८५ रूपैयाँमा कारोबार भइरहेको छ।
