काठमाडौं- प्रक्रिया सुरु भएको एक वर्षपछि नेपाल वायुसेवा निगमको जहाजले खतराजन्य वस्तु बोक्ने अनुमति पाएको छ। निगमले २०२० को डिसेम्बरदेखि खतराजन्य वस्तु बोक्नका लागि आवश्यक प्रक्रिया पुरा गर्न भन्दै कमिटि नै गठन गरेको थियो।
तत्कालिन महाप्रबन्धक डिमप्रकाश पौडेलले कमिटी गठन गरेको थिए। अन्तत: निगमका जहाजले खतराजन्य वस्तु बोक्ने अनुमति पाएको हो।
खतराजन्य पदार्थ ओसारपसारको अनुमतिको लागि अन्तर्राष्ट्रिय नागरिक उड्डयन संगठनको एनेक्स १८ मा भएको सबै प्रक्रिया पुरा गरेपछि अनुमति पाएको हो। सबै प्रक्रिया पुरा गरेपछि नेपाल नागरिक उड्डयन प्राधिकरणले निगमलाई प्रमाण पत्र दिएको हो।
निगमका जहाजको कार्गो बोक्ने क्षमता करिब १५ टन रहेकोमा आगामी दिनमा खतराजन्य पदार्थ अन्तर्गतका विभिन्न औषधीजन्य र विद्युतीय सामानलगायतका सामानहरुको ओसारपसारमा सहजत हुने आकलन गरिएको छ। साथै यसबाट निगमको आम्दानी तथा सरकारको राजस्व समेत बढ्ने भएको छ।
