काठमाडौं- वाणिज्य बैंकहरूमा पछिल्लो सातादेखि निक्षेप बढ्न थालेको छ। केही महिनादेखि ओरालो लागेको निक्षेप मंसिर १० देखि १७ सम्मको तथ्यांकमा भने केही सुधार देखिएको हो।
नेपाल बैंकर्स संघले सार्वजनिक गरेको तथ्यांकअनुसार बैंकमा निक्षेप ७ अर्ब रुपैयाँले बढेको छ भने कर्जाको माग १४ अर्ब रुपैयाँ रहेको छ। निक्षेपमा केही सुधार देखिए पनि कर्जाको माग भने दोबर नै बढेको छ।
गत साता भने कर्जाको माग १४ अर्ब रुपैयाँले बढ्दा निक्षेप ६ अर्ब रुपैयाँले घटेको थियो।
हाल ४२ खर्ब १९ अर्ब रुपैयाँ रहेको निक्षेप ७ अर्ब रुपैयाँले बढेर ४२ खर्ब २६ अर्ब रुपैयाँ पुगेको छ। कर्जाको माग १४ अर्ब रुपैयाँले बढेपछि कर्जा प्रवाह ४० खर्ब ५५ अर्ब रुपैयाँ रहेकोमा कर्जा प्रवाह ४० खर्ब ६९ अर्ब रुपैयाँ पुगेको छ।
