काठमाडौं- सरकारले तीनवटै अन्तर्राष्ट्रिय विमानस्थललाई सार्वजनिक निजी साझेदारी (पीपीपी) अवधारणामा सञ्चालनका लागि अध्ययन गर्न अध्ययन समिति बनाउने निर्णय गरेको छ।

आज बसेको मन्त्रिपरिषद्को बैठकले पूर्वसचिव शंकरप्रसाद अधिकारीको संयोजकत्वमा विमानस्थललाई पीपीपी अवधारणामा सञ्चालनका बारेमा अध्ययन गरी सुझावसहितको प्रतिवेदन दिन कार्यादेश दिएको छ। 

निजगढमा अन्तर्राष्ट्रिय विमानस्थल निर्माण गर्ने सर्तमा विमानस्थल व्यवस्थापनको करार दिने बारेमा अध्ययन गर्न समिति गठन गरिएको हो। यो अनुसार जुन कम्पनीले तीनवटा विमानस्थलको व्यवस्थापनको जिम्मा लिन्छ उसैले निजगढमा विमानस्थल निर्माण पनि गर्नुपर्ने छ।

पूर्वसचिव शंकरप्रसाद अधिकारीको संयोजकत्वमा लगानी विज्ञ घनश्याम ओझा, हवाई महाशाखा प्रमुख बुद्धिसागर लामिछाने, लगानी बोर्डका सहसचिव र सदस्य सचिव रहने गरी नागरिक उड्डयन प्राधिकरणका उपनिर्देशक दिपेन्द्र श्रेष्ठ रहेको ५ सदस्य समिति गठन गरिएको हो।

त्यस्तै वायुसेवा निगम करार व्यवस्थापनका लागि योजना आयोगका पूर्वउपाध्यक्ष दिपेन्द्रबहादुर क्षेत्रीको संयोजकत्वमा टीकाराम राई, पर्यटन विभागका महानिर्देशक अर्थ मन्त्रालयको प्रतिनिधि र वायुसेवा निगम अर्थ विभाग प्रमुख सदस्य रहने गरी ५ जनाको समिति गठन गरिएको छ।