काठमाडौं- बजारमा बिक्री भइरहेको आयोडिन नुनको गुणस्तर परीक्षण हुँदा त्यसमा कुनै खराबी नरहेको प्रमाणित भएको छ। 

वाणिज्य, आपूर्ति तथा उपभोक्ता संरक्षण विभागले बजार अनुगमनका क्रममा नुनमा आयोडिनको मात्रा बढी भएको गुनासो तथा उजुरीको आधारमा गुणस्तर परीक्षण गरेको थियो।

विभागले आफ्नै ल्याब नहुँदा खाद्य प्रविधि तथा गुण नियन्त्रण विभागको ल्याबमा पठाएर नुनमा प्रयोग भएको आयोडिनको मात्रा परीक्षण गराएको थियो।

परीक्षणका क्रममा नुनमा आयोडिनको मात्रा तोकिएको मापदण्डभित्र रहेको र खानयोग्य रहेको रिपोर्ट वाणिज्य विभागलाई दिएको महानिर्देशक तिर्थराज चिलुवालले जानकारी दिए।

विभागले बजारबाट नमुना संकलन गरेर दुईसाता अगाडि परीक्षणका लागि पठाएको थियो।

विभागले तोरीको तेल र शिशु आहारको पनि गुणस्तर परीक्षणका लागि ल्याबमा पठाएको छ। यसमा भने रिपोर्ट आउन बाँकी रहेको छ।