काठमाडौं- राजस्व अनुसन्धान विभागको टोलीले काठमाडौँको क्षेत्रपाटीबाट स्रोत नखुलेको २ करोड ३० लाख रुपैयाँसहित चार जनालाई पक्राउ गरेको छ।

पक्राउपर्नेमा नरेश अग्रवाल र उनका सहयोगी रहेका विभागका महानिर्देशक नवराज ढुंगानाले जानकारी दिए।

'राजस्व अनुसन्धान विभागको टोलीले करिब २ करोड ३० लाखजति रकमसहित चार जनालाई पक्राउ गरेको छ' उनले भने।

व्यापारी नरेश अग्रवालको घरमा राजस्व अनुसन्धान विभागले छापा मारेपछि उक्त रकम फेला परेको बताइएको छ। बरामद गरिएको रकम हुण्डी कारोबारको हुनसक्ने अनुमान गरिएको छ।

पक्राउ परेकाहरुविरुद्ध थप अनुसन्धानका लागि हिरासतमा राख्न आजै अदालतबाट म्याद लिने विभागको तयारी रहेको विभागका महानिर्देशक ढुंगानाले बताए।