काठमाडौं- चालु आर्थिक वर्षको पाँच महिनामा करिब ३ करोड अमेरिकी डलर विदेशी लगानी भित्रिएको छ। पछिल्लो तीन वर्षदेखि विदेशी लगानीमा निरन्तर संकुचन आइरहेको अवस्थामा यो वर्ष पनि उल्लेखनीय सुधार देखिएको छैन।
नेपाल राष्ट्र बैंकको तथ्यांकअनुसार यो वर्षको साउनदेखि मंसिरसम्मको अवधिमा जम्मा २ करोड ९७ लाख अमेरिकी डलर प्रत्यक्ष विदेशी लगानीका रुपमा भित्रिएको छ।
गत वर्षको तुलनामा भने यो धेरै हो। गत वर्षको यही अवधिमा १ करोड ८७ लाख डलर लगानी भित्रिएको थियो। यद्यपि पाँच महिनामा भित्रिएको यो लगानीको रकम भने ज्यादै न्यून हो।
विश्वव्यापी प्रत्यक्ष विदेशी लगानीमा आइरहेको गिरावट तथा नेपालकै अवस्थामा पनि सुधार नहुँदा लगानी प्रभावित भएको हो।
लगानीको वातावरण बनाउनका लागि आवश्यक सुधार कहिलै नहुँदा विदेशी लगानीको ढोका अझै खुलेको छैन। जोखिमको तुलनामा लाभको ग्यारेन्टी नभएको, भ्रष्टाचार अत्याधिक भएका कारणले गर्दा विदेशी लगानीको वातावरण बन्न नसकेको विभिन्न अन्तर्राष्ट्रिय संस्थाहरूले औँल्याउँदै आएका छन्।
अनियमित बाटोबाट काम गर्नेहरूले अधिक अवसर तथा लाभ पाउने अवस्था हुँदासम्म भ्रष्टाचारमा सख्त कानूनी व्यवस्था भएका मुलुकबाट लगानी आउने सम्भावना नभएको त्यस्ता संस्थाले औल्याउँदै आएका छन्।
पछिल्लो समय भारतबाट जलविद्युत उत्पादनमा बाहेक खासै विदेशी लगानी आएको छैन।
