काठमाडौं- चीनको निर्यात व्यापार ७ वर्षमा पहिलोपटक घटेको छ। २०२३ मा चीनको निर्यात व्यापार ४.६ प्रतिशतले घटेको हो। 

विश्व बजारमा माग कम भएपछि २०१६ यता चीनको निर्यात व्यापार २०२३ मा घटेको हो। २०२३ मा चीनले ३३ खर्ब ८० अर्ब डलर बराबरको निर्यात गरेको चीनको भन्सार नियकायले सार्वजनिक गरेको तथ्यांक छ। २०२२ मा चीनको निर्यात व्यापार २०२१ को तुलनामा ७ प्रतिशतले बढेको थियो। 

पछिल्लोपटक २०१६ मा चीनको निर्यात व्यापार ७.७ प्रतिशतले घटेको थियो। उक्त समयमा पनि विश्वभर माग कम हुँदा चीनको निर्यात घटेको थियो। 

त्यस्तै चीनको आयात व्यापार पनि २०२३ मा ५.५ प्रतिशतले घटेको हो। गत वर्ष चीनले २५ खर्ब ६० अर्ब डलर बराबरको आयात गरेको थियो। विश्वको दोस्रो ठूलो अर्थतन्त्र चीनको २०२३ को आयात निर्यात व्यापार ८ खर्ब २३ अर्ब डलर बचतमा रहेको छ। 

विगत केही वर्षयता विश्व अर्थतन्त्रको सुधार धिमा गतीमा भएकाले चिनियाँ सामानको मागमा त्यसको प्रभाव परेको चीनको भन्सार प्रशासनका प्रवक्ता ल्यु डालियाङले बताएका हुन्। २०२४ मा पनि निर्यात व्यापारसमेत कठीनाइपूर्ण अवस्थाबाट गुज्रने उनको भनाइ छ।