काठमाडौं- चालु आर्थिक वर्ष २०८०/०८१ को साउनदेखि मंसिरसम्ममा वैदेशिक रोजगारीमा जाने कामदारको संख्या अघिल्लो वर्ष यही अवधिको तुलनामा घटेको छ।

नेपाल राष्ट्र बैंकले सार्वजनिक गरेको तथ्यांकअनुसार गत आव २०७९/०८० साउनदेखि मंसिर मसान्तसम्म वैदेशिक रोजगारीमा जाने कामदारको संख्या ३ लाख ५२ हजार ७ सय २७ थियो। चालु आवमा यो संख्या र २ लाख ७७ हजार ५ सय ९२ रहेको छ। जुन गत आवको भन्दा २१.३० प्रतिशतले कम हो।

चालु आवको पाँच महिनामा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत-नयाँ) लिनेको संख्या १ लाख ७३ हजार ५ सय ५५ र पुनः श्रम स्वीकृति लिनेको संख्या १ लाख ४ हजार ३७ रहेको छ। 

अघिल्लो वर्षको सोही अवधिमा यस्तो संख्या क्रमशः २ लाख ३६ हजार ७ सय ७९ र १ लाख १५ हजार ९ सय ४८ रहेको थियो।

राष्ट्र बैंकले सार्वजनिक गरेको तथ्यांकअनुसार नयाँ कामको लागि रोजगारीमा जानेको संख्यामा गिरावट आएको छ भने बिदामा नेपाल आइ पुन: विदेश जानेको संख्यामा पनि ११ हजारभन्दा बढीले कम हो।