काठमाडौं- अख्तियार दुरुपयोग अनुसन्धान आयोगले राजस्व चुहावट गरी भ्रष्टाचार गरेको अभियोगमा दायर गरिएको मुद्दामा विशेष अदालत काठमाडौंबाट भएको फैसलाउपर चित्त नबुझेको जनाउँदै सर्वोच्च अदालतमा पुनरावेदन गरेको छ।

तत्कालीन कर फछर्यौट आयोगका पदाधिकारीहरू लुम्बध्वज महत, उमेशप्रसाद ढकाल र चुडामणि शर्मा ढकालविरुद्ध विशेष अदालतले कम जरिबाना हुने गरी फैसला गरेको भन्दै आयोग सर्वोच्च पुगेको हो। 

अख्तियारले उक्त मुद्दामा तीनजना प्रतिवादीविरुद्ध ११ अर्ब २ करोड ५२ लाख २२ हजार २ सय २७ बिगो दाबी गरे पनि विशेष अदालतले ४ अर्ब ८६ करोड ८१ लाख ७५ हजार ३ सय ८० रुपैयाँ बराबरको बिगो कायम गरी गरेको फैसला त्रुटीपूर्ण भएको दाबी गरेको छ।

विशेष अदालतले कर फछर्यौट आयोगका तत्कालीन अध्यक्ष महतलाई ९ वर्ष १ महिना र आयोगका सदस्य उमेशप्रसाद ढकाल र चुडामणि शर्मा ढकाललाई ९ वर्ष कैद सजाय हुने ठहर गरेको थियो।

आयोगले विभिन्न १० वटा बुँदामा विशेष अदालतबाट भएको फैसला त्रुटीपूर्ण रहेको दाबी गरेको छ।