काठमाडौं- नेपाल दूरसञ्चार प्राधिकरणका अध्यक्ष पुरुषोत्तम खनालले दिएको राजिनामा मन्त्रिपरिषद्ले स्वीकृत गरेको छ। 

आजैमात्र खनालले पदबाट राजिनामा दिएका थिए। विभिन्न खरिद तथा पछिल्लो समय स्मार्टको लाइसेन्स र एनसेलको खरिदको विषयमा मन्त्री रेखा शर्मासँग विवाद भएको थियो। 

मन्त्री भएर आएदेखि नै खनाललाई हटाउन खोजे पनि खनालले अहिले आएर राजिनामा दिएका थिए। 

खनालले राजिनामा दिएपछि अध्यक्ष नियुक्तीको प्रक्रिया अघि बढाउने निर्णय आजैको मन्त्रिपरिषदले गरेको छ। सञ्चार तथा सूचना प्रविधि मन्त्रालयकाय सचिवको संयोजकत्वमा सिफारिस समिति बनाउने सरकारले निर्णय गरेको छ। समितिले सिफारिस गरेपछि सरकारले अध्यक्ष नियुक्त गर्नेछ। 

अध्यक्ष नहुँदासम्मका लागि सरकारले बोर्ड सदस्य नवराज अधिकारीलाई कार्यवाहक अध्यक्षको जिम्मेवारी दिने निर्णय गरेको छ। यसअघि बोर्ड सदस्यभन्दा प्राधिकरण भित्रकै वरिष्ठ निर्देशकलाई यस्तो जिम्मेवारी दिने चलन थियो।