काठमाडौं- मंसिर मसान्तसम्ममा काठमाडौं महानगरपालिकाकाका एक लाख १९ हजार ४ सय ५९ जना करदाताले कर तिरेका छन्। यसरी तिरिएको करबाट २ अर्ब ६६ करोड ९८ लाख ४५ हजार ४९४ रुपैयाँ राजस्व संकलन भएको छ।  

यसमा ३५ हजार ५७ जना बहाल करदाता, ३१ हजार ९ सय १६ व्यवसाय करदाता र ५२ हजार ४ सय ८६ जना सम्पत्ति करदाता रहेको महानगरले जनाएको छ।

सोमबारमात्रै ३ करोड ९४ लाख ५१ हजार राजस्व संकलन भएको छ। चालु आर्थिक वर्षको यस अवधिमा आन्तरिक आय, बाँडफाँटबाट प्राप्त राजस्व र समानीकरण, सशर्तजस्ता आन्तरिक अनुदानबाट प्राप्त गरी ४ अर्ब ५१ करोड ५२ लाख ८१ हजार ९ सय ४७ रुपैयाँ जम्मा भएको छ। यो लक्ष्यको ४१.७८ प्रतिशत हो। 

यस वर्ष करदाताको संख्या ३ लाख ४३ हजार ६ सय ४० छ।

गएको वर्ष (आव २०७९/०८०) मा ३ लाख २४ हजार १ सय २० जना करदाता थिए। उनीहरुमध्ये आर्थिक वर्षभरिमा १ लाख ९१ हजार ८ सय ८६ जनाले कर तिरे। कर नतिर्नेको संख्या १ लाख ३२ हजार २ सय ३४ रहेको महानगरले जनाएको छ।

महानगरका अनुसार गएको आर्थिक वर्षको अन्त्यसम्ममा कर तिरेका करदाताको संख्यालाई चालु आर्थिक वर्षका लागि करदाताको संख्या मान्ने गरिएको छ। सोमबार बसेको राजस्व परामर्श समितिको बैठकमा सदस्य सचिव ध्रुव काफ्लेले करदाता र कर तिर्ने अभ्यासका विषयमा विवरण गरेका हुन्।