काठमाडौं- श्रम स्वीकृति लिइ रोजगारीमा जापान, दक्षिण कोरिया, युरोप, संयुक्त राज्य अमेरिका र क्यानडामा जाने नेपालीले अधिकतम ५ सय डलरसम्म सटही सुविधा पाउने भएका छन्।
नेपाल राष्ट्र बैंकको विदेशी व्यवस्थापन विभागले एकीकृत निर्देशन जारी गर्दै उक्त व्यवस्था गरेको हो। यसअघि वैदेशिक रोजगारीमा जाने नेपाली नागरिकले २ सय अमेरिकी डलरसम्म सटही सुविधा पाउँदै आएका थिए।
राष्ट्र बैंकले एकीकृत निर्देशनमार्फत जापान, कोरिया, अमेरिका, युरोप र क्यानडामा रोजगारीमा जाने नेपालीका लागि अन्य मुलुकमा रोजगारीमा जानेलाई भन्दा बढी सटही सुविधा दिन लागेको हो। यीबाहेकका अन्य मुलुकमा रोजगारीमा जाने नेपालीले भने अधिकतम २ सय डलरसम्मकै सटही सुविधा पाउने छन्।
राष्ट्र बैंकले सटही सुविधा उपलव्ध गराउने सर्तहरु केही लचिलो नीति लिएको छ। यसअघि सुविधा लिन वैदेशिक रोजगारीमा जाने श्रमिकले राहादानी, कन्फम्र्ड हवाई टिकट, नाम, ठेगाना र फोटो सहित अग्रिम भिसा र आवश्यकता परेमा भिसा प्राप्त राहादानीको पृष्ठको छविचित्र अनिवार्यरुपमा पेश गर्न गराउनुपर्ने व्यवस्था रहेको थियो। राष्ट्र बैंकले एकिकृत निर्देशन संसोधन मार्फत विद्युतिय माध्यबाट जारी हुने भिषा र टिकटको आधारमा पनि सटही दिने नयाँ व्यवस्था थपेको छ।
