काठमाडौं- चालु आर्थिक वर्षको मंसिर महिनामा १ खर्ब ३२ अर्ब रुपैयाँ बराबरको वस्तु आयात भएको छ। चालु आर्थिक वर्षको कात्तिक महिनासम्ममा ५ खर्ब १२ अर्ब रुपैयाँको वस्तु आयात भएकोमा मंसिरमा ६ अर्ब ४२ अर्ब रुपैयाँको वस्तु आयात भएको हो।
गत आर्थिक वर्षको यसै अवधिको तुलनामा आयात ३.३९ प्रतिशतले घटेको छ। गत वर्ष मंसिरमा कुल ६ खर्ब ६४ अर्ब रुपैयाँ बराबरको वस्तु आयात भएको थियो।
चालु आर्थिक वर्षको पहिलो ५ महिनामा निर्यात ६.०९ प्रतिशतले घटेको छ। गत वर्षको मंसिरसम्ममा ६८ अर्ब ३० करोड रुपैयाँ बराबरको वस्तु निर्यात भएकोमा चालु आर्थिक वर्षको सोही अवधिमा ६३ अर्ब २१ करोड रुपैयाँ बराबरको मात्रै वस्तु निर्यात भएको छ।
आयात र निर्यात घटेकाले व्यापार घाटा पनि ३.६४ प्रतिशतले घटेको छ। चालु आर्थिक वर्षको मंसिरसम्म नेपालको कुल व्यापार घाटा ५ खर्ब ७९ अर्ब रहेको छ। गत वर्षको यसै अवधिमा नेपालको व्यापार घाटा ५ खर्ब ९७ अर्ब रुपैयाँ रहेको थियो।
चालु आर्थिक वर्षको साउनमा १ खर्ब २९ अर्ब रुपैयाँ, भदौंमा १ खर्ब ३० अर्ब रुपैयाँ, असोजमा १ खर्ब ४९ अर्ब रुपैयाँ र कात्तिकमा १ खर्ब ४ अर्ब रुपैयाँको वस्तु आयात भएको थियो।
