काठमाडौं-  पूर्वप्रधानमन्त्री डा बाबुराम भट्टराईले विश्व बैंकको नीतिको आलोचना गरेका छन्। समाजिक सञ्जाल एक्समा एक लेख्दै नेपालका सन्दर्भमा विश्व बैंकले लिएको नीतिको आलोचना गरेका हुन्। 

शब्दजाल बिछ्याउने तथा सबैलाई एउटै नीतिगत डालोमा राखेर लाद्ने काम भइरहेको भन्दै उनले यसबाट नेपालको उत्थान नहुने बताएका हुन्। विश्व बैंककी म्यानेजर आना बजेर्डेको पोष्टमा कोट गर्दै उनले ‘वान साइज फिट फर अल’ को नीति लाद्ने काम बन्द गर्न आग्रह गरेका छन्। 

हरित, उत्थानशील र समावेशी विकासका लागि विश्व बैंकले नेपालमा पछिल्लो समय अभियान चलाइरहेको छ। दातृ निकायलाई एकीकृत गर्दै एउटै अभियानमा रकम परिचालन गर्न बैंकले नेतृत्व गरेको छ। 

तर यी शब्द राम्रो भएपनि यस्तो लक्ष्य प्राप्त गर्नका लागि के गर्नुपर्छ भनेर स्थानीय र क्षेत्रीय सन्दर्भमा ठोस कार्ययोजना आउनुपर्ने उनले उल्लेख गरेका छन्। तर विश्व बैंकले मिठो शब्दाजाल बुन्नेमात्र गरेको उनको आसय छ। 

‘ग्रिन, रेजिलियन्ट र इन्क्लुसिभ आकर्षक शब्द हुन्। यी शब्द यस्ता हुन् कि जो स्वर्गका समानार्थी जस्ता हुन्। स्वर्ग कसलाई मन पर्दैन? तर त्यहाँसम्म कसरी पुग्ने? कसलाई थाहा छैन’ उनले उल्लेख गरेका छन्। 

नेपाल र नेपालजस्तै अल्पविसित मुलुकहरूको आधारभूत समस्या कृषिमाथिको निर्भरता, न्यून उत्पादकत्व र बाह्य निर्भरता रहेको उनको भनाइ छ। कुशासन र अव्यवस्थाजस्ता समस्याहरू समाधान नगरि यस्ता देशको विकास नहुने उनको भनाइ छ। 

विश्व बैंकको शब्दजालको आलोचना गरेका भट्टराईले आफ्नो पार्टीको विकास नीति भन्दै शब्दजालको प्रचार भने गरेका छन्। उनले ग्रोथ, इक्विटी, सस्टेनबिलिटी र ह्याप्पिनेसको मोडलर आफ्नो पार्टीले अघि सारेको उल्लेख गरेका छन्।