काठमाडौं- हिमालयन बैंकको विवाद फेरि अदालतमा पुगेको छ। बैंकको सर्वसाधारण सेयरधनीको अनुपात राष्ट्र बैंकको नियमअनुसार ३० प्रतिशत पुर्‍याएर मात्र साधारण सभा गर्न भन्दै उच्च अदालत पाटनमा मुद्दा परेको हो।

हिमालयन बैंकको कुल सेयर पुँजीमा सर्वसाधारण सेयरधनीको अनुपात हाल २७ प्रतिशत मात्रै छ। बैंक तथा वित्तीय संस्थासम्बन्धी ऐन २०७३ को दफा ९(१) र ९(४) बमोजिम सर्वसाधारण सेयरधनीको कुल जारी पुँजीको कम्तीमा ३० प्रतिशत हुने गरी बैंकको पुँजी संरचनालाई व्यवस्थित गरेर मात्रै साधारण सभा गर्न र सर्वसाधारणबाट सञ्चालक चयन गर्न भन्दै हालका सञ्चालक मध्येका एक सञ्चालकले मुद्दा दायर गरेका हुन्।

मुद्दामा बैंकका केहि निहित स्वार्थ भएका सञ्चालकहरुले सर्वसाधारण सेयरधनीका तर्फबाट बैंकको सञ्चालक समितिमा प्रतिनिधित्वमा जालझेल गर्न खोजेको आरोप समेत लगाइएको छ।

यसअघि पनि हिमालयन बैंकको सञ्चालक विवाद पटक पटक अदालतमा पुगेको थियो।

हिमालयन बैंकमा स्थापना कालदेखि नै नीजि क्षेत्रबाट ४ वटा समुह संस्थापक सेयरधनी मनोज बहादुर श्रेष्ठ, प्रेम प्रकाश खेतान, हिमालय शमशेर राणा र हविव बैंक अफ पाकिस्तानका प्रतिनिधि सलीम अम्लानी रहेका छन्। यी ४ संस्थापक सेयरधनी बाहेक कर्मचारी सञ्चय कोष तथा सर्वसाधारण सेयरधनीहरू समेत रहेका छन्।