काठमाडौं- नेपाल उद्योग वाणिज्य महासंघका अध्यक्ष चन्द्रप्रसाद ढकालले गैर आवासयी नेपालीहरूलाई कुराभन्दा काम गर्न आग्रह गरेका छन्। 

‘एनआरएनएले नेपालीका लागि नेपाली नाम दिएर अभियान सुरु गरेको पनि २० वर्ष भएको र आफू पनि सुरुदेखि नै यो संस्थासँग जोडिएको उनले बताए। 

राजधानीमा आजदेखि सुरू भएको महाधिवेसनलाई सम्बोधन गर्दै ढकालले कुराभन्दा काम गर्नुपर्ने समय आएको बताए। 

‘हामीले विगतदेखि धेरै कुरा गरिसकेका छौँ र मलाई लाग्छ अब काम गर्ने बेला आएको छ। हामीले हामीले विगतदेखि गर्दै आएको भाषणको प्रतिफल मैले खासै पाएको छैन’ उनले भने,’अब भने हामीले यो दुई दशकको अवधिमा के गर्यौँ भनेर पनि सोच्नुपर्दछ। अब एनआरएनएले नेपाली मातृभूमिमा देखाउन मिल्ने उत्कृष्ट मोडलको काम या प्रोजेक्ट कुन हो भनेर देखाउनुपर्ने दिन पनि आएको छ। अब त्यसमा जाउँ भन्ने आजका दिनमा म यहाँहरु सबैमा आग्रह गर्दछु।’ 

कुराभन्दा काम गर्न रुचाउने एक्सन ओरेन्टेड पुस्ताको  उदय भएकाले अब काम नै गर्नुपर्ने उनको भनाइ छ। 

देशमा लगानीको वातावरण  भएकाले लगानी गर्न आग्रह गरेका छन्। 

‘होलान्, लगानीका लागि कतिपय बाधा व्यवधान पनि होलान् । तर ती पनि सबै हाम्रै माटोका उपज हुन्। त्यसका लागि सबै सँगै लडौँला, जस्तो सुकै समस्या पनि समाधान गर्न सकिन्छ भनेर लागौँला। महासंघमा पनि हामीले वैदेशिक लगानी समन्वय शाखा स्थापना गरेका छौँ र अरु हिसाबले पनि हामी के सक्छौँ सहयोग गर्न सक्छौँ’ उनले भने।