काठमाडौं- रसियन रक्षा तथा सैन्य उद्योगलाई सहयोग गरेको आरोपमा अमेरिकी सरकारले चीनका ४२ कम्पनीलाई निर्यात प्रतिबन्धको सूचीमा थप गरेको छ। 

अमेरिकी वाणिज्य विभागले शुक्रबार सूचना जारी गर्दै निर्यात प्रतिबन्धको सूचीमा थप ४२ चिनियाँ कम्पनी थपिएको जानकारी दिएको छ। 

अमेरिकामा उत्पत्ति भएका वस्तु तथा सेवाको उपयोग गर्ने ती उद्योगले रसियन रक्षा उद्योगलाई सहायता पुर्‍याएको आरोपमा अमेरिकाले प्रतिबन्ध लगाएको हो। यस्ता कम्पनीलाई कुनै पनि अमेरिकी कम्पनीले बिक्री गर्न पाउने छैनन्। 

रसियान रक्षा उद्योगलाई सहयोग गरेको आरोपमा अमेरिकाले थप ६ देशका सात कम्पनीमाथि पनि निर्यात प्रतिबन्ध लगाएको छ। फिनल्याण्ड, जर्मनी, भारत, टर्की, युएई र सयुक्त अधिराज्यका कम्पनी यसमा परेका छन्। 

युक्रेनका सर्वसाधारणलाई लक्षित गर्दै रसियाले हानेका मिसाइल तथा ड्रोनमा उपयोग हुने प्रविधि तथा उपकरणको निर्यात गर्ने यी कम्पनीलाई प्रतिबन्ध लगाइएको विभागले जानकारी दिएको छ। 

यदि अझै पनि अमेरिकामा उत्पत्ति भएको प्रविधि उपयोग गरेर रसियालाई आपर्ती गरेको खण्डामा पत्ता लगाउने र तत्काल कारबाही गरिने विभागले उल्लेख गरेको छ। 

अमेरिकाले यसअघि हुवावेसहितका कम्पनीको सेवा लिन र उसलाई सेवा बिक्री गर्न अमेरिकी कम्पनीलाई रोक लगाइसकेको छ। पछिल्लो समय हुवावेलाई सेवा दिने कम्पनी पनि यस्तो प्रतिबन्धित सूचीमा पर्दै आएका छन्।