महेन्द्रनगर- प्रहरीले कञ्चनपुरमा २१ लाख रूपैयाँ बराबरको अवैध सामान बरामद गरेको छ। भारतबाट लुकिछिपी ल्याउने अवैध सामान नियन्त्रणमा प्रहरीले सक्रियता बढाएसँगै राजस्व संकलनमा समेत वृद्धि भएको छ।

भारतसित सीमाना जोडिएको कञ्चनपुरमा ठूला व्यापारी नै भन्सार छलेर लाखौँको सामान ल्याउने गरेको पाएपछि पछिल्लो समय कञ्चनपुर प्रहरीले दिनहुँ छापा मार्न थालेको छ। दुई दिनयता जिल्ला प्रहरी कार्यालयले भीमदत्त नगरपालिका-६ र १८ मा गोदाममा छापा मारेर भन्सार छलेर ल्याएको २१ लाख रूपैयाँ बराबरको सामान बरामद गरेको हो। 

जिल्ला प्रहरी कार्यालय कञ्चनपुरका प्रवक्ता प्रहरी निरीक्षक पुष्करराज पन्तका अनुसार गड्डाचौकी नाका हुँदै भारतबाट भन्सार छलेर ल्याएको सामान बरामद गरिएको हो। व्यापारी भुवन भाटको घरमा छापा मार्दा दश लाख रूपैयाँको खाद्य तथा किराना सामान बरामद गरिएको उनले बताए।

प्रहरी उपरीक्षक कमल थापाले भन्सार छलेर अवैध रुपमा सामान ल्याउने ठूला व्यापारीमाथि निगरानी बढाइएको बताए। सोही क्रममा प्रहरीले शुक्रबार महेन्द्रनगरका व्यापारी सुशील गुप्ताको गोदाममा छापा मारेको थियो। प्रहरीले गोदामबाट ११ लाख रूपैयाँ बराबरको सामान बरामद गरेको प्रहरी उपरीक्षक थापाले जानकारी दिए।

गड्डाचौकी भन्सार कार्यालयमा पाँच वर्षअघि स्थापना गरिएको उपकरण थन्क्याइएको छ। उक्त उपकरण सञ्चालनका लागि भन्सार कार्यालयले हालसम्म चासो देखाएको छैन। रासस