चितवन- यहाँ लगाइएको धानमा विभिन्न रोगको सङ्क्रमण देखिएका छन्। कृषि ज्ञान केन्द्र चितवनका सूचना अधिकारी सुरुचि त्रिपाठीका अनुसार पश्चिम चितवनमा लगाइएको धानमा ढुसी र गबारोको समस्या देखिएको हो।

यस्तै पूर्वी चितवनमा फड्के किरा, मिलिबग, सित ब्लाइट, नेक ब्लाष्टजस्ता रोग देखिएको उनले जानकारी दिइन्। उनका अनुसार कार्यालयमा दैनिक तीनदेखि चारजना धानमा लागेको समस्या लिएर आउने गरेका छन्। उनले भनिन्, 'धानमा लागेको समस्या लिएर आउने किसानको सङ्ख्या बढ्दो छ। पूर्वी चितवनमा फड्के किराको समस्या मुख्य देखिएको छ।'

कालिका र खैरहनी नगरपालिकामा लगाइएको धानमा विशेषगरी फड्के किराको समस्या देखिएको उनको भनाइ छ।

यो किराले धानको गाँजमा बसेर धानको रस चुसी सुकाउने गर्दछ। जसका कारण पात जल्ने र गाँज परालजस्तो देखिने त्रिपाठीले बताइन्। रोग नियन्त्रणका लागि कृषि विज्ञसँगको परामर्शमा विषादीको प्रयोग गर्न उनले सुझाव दिइन्।

जिल्लामा यस वर्ष २३ हजार ३४ हेक्टर क्षेत्रफलमा धान खेती गरिएको छ। रासस