काठमाडौं- संसदमा दर्ता भएदेखि नै किसानहरुले चर्को विरोध गर्दै आएको कृषि कानून सम्बन्धिका तीनवटा विधेयकहरु भारत सरकारले फिर्ता लिने घोषणा गरेको छ। 

भारतीय प्रधानमन्त्री नरेन्द्र मोदीले ती विधेयक संसदबाट फिर्ता गरिने आजै घोषणा गरेका छन्। 

कृषि सम्बन्धिका तीन विधेयकबाट भारत सरकारले कृषि क्षेत्रलाई डिरेगुलेट गर्ने प्रस्ताव गरेको थियो। यसबाट न्यूनतम मूल्यको ग्यारेन्टी नहुने भन्दै किसानहरुले निरन्तर विरोध गर्दै आएका थिए। 

सन् २०२० मा भारतीय सरकारले संसदमा कृषि सम्बन्धिका कानून दर्ता गराएको थियो। 

भारतीय प्रधानमन्त्रीले कृषि क्षेत्रलाई आधुनिकीकरण गर्न भन्दै ल्याएका ती कानूनका विरुद्धमा सुरुदेखि नै किसानहरुले विरोध गरेका थिए। 

एक वर्षदेखि नयाँ दिल्ली हरियाना क्षेत्रमा किसानहरुले निरन्तर विरोध प्रदर्शन पनि गरे। भारतको प्रमुख प्रतिपक्षी दलको पनि निरन्तरको विरोध जारी रह्यो। अन्तत: मोदी सरकार किसान आन्दोलनसँग झुक्न बाध्य भयो।