काठमाडौं- सरकारले ढुवानी सेवामा भ्याट लगाएसँगै घोडा खच्चडलगायतका जनावरबाट हुने ढुवानीलाई समेत करको दायरामा ल्याउने भएको छ।

आन्तरिक राजस्व विभागले ढुवानी सेवामा मूल्य अभिवृद्धि कर कार्यान्वयन निर्देशिका, २०८० जारी गर्दै जनावरबाट हुने ढुवानीलाई समेत करको दायरामा ल्याउने गरी ढुवानीका साधनहरूलाई परिभाषित गरेको छ। 

विभागले ढुवानीको साधन भन्नाले ट्रक, टयांकर, हवाईजहाज, हेलिकोप्टर, रोपवे, केवलकार, रञ्जुमार्ग, जल यातायात, जनावरमार्फत वा अन्य कुनै किसिमले सेवा शुल्क लिइ मालसामान ढुवानी गर्नेलाई जनाउनुपर्ने बताएको छ। तर वार्षिक ५० लाख रुपैयाँभन्दा कम कारोबारको हकमा भने भ्याट अनिवार्य नहुने विभागको निर्देशिकामा उल्लेख छ। 

विभागका महानिर्देशक दीर्घराज मैनालीका अनुसार ढुवानीका साधनको परिभाषामा सबैलाई समावेश गरिए पनि ५० लाखभन्दा कम कारोबारको हकमा भ्याट लाग्दैन। उदाहरणका लागि कसैले कम्पनीमार्फत व्यावसायिक रुपमा ठूलो संख्यामा खच्चड, चौरीमार्फत सामान ढुवानी गरेको छ र वार्षिक ५० लाखभन्दा बढीको कारोबार गर्छ भने भ्याट लाग्ने उनले बताए।

यसैगरी निर्देशिकाअनुसार भरियाको हकमा पनि भ्याट लाग्ने छ। तर उसले वार्षिक ५० लाख रुपैयाँभन्दा बढीको कारोबार गरेको हुनुपर्ने छ।