काठमाडौं- नेपाल राष्ट्र बैंकले नेपालमा दैनिक सुन आयातको कोटा बढाउने निर्णय गरेको छ। राष्ट्र बैंकको सञ्चालक समितिले सुनको दैनिक आयातको कोटा २० किलो बनाउने निर्णय गरेको छ। 

हालसम्म सुन दैनिक रुपमा १० किलो आयातको कोटा रहेको छ। वाणिज्य बैंकले दैनिक १० किलो सुन आयात गर्दै वितरण गरिरहेका छन्। 

२ वर्षअघि वैदेशिक मुद्राको सञ्चितिमा दबाब आएपछि राष्ट्र बैंकले सुन चाँदी आयातमा कडाइ गरेको थियो। सुनको आयात कोटा घटाउँदै १० किलोमा झारिएको थियो। 

पछिल्लो समय सुन चाँदी व्यवसायीहरूले निरन्तर रुपमा सुनको कोटा बढाउन माग गर्दै आएका थिए। 

२० किलोको कोटा निर्धारण गर्ने निर्णय राष्ट्र बैंकको सञ्चालक समितिबाट निर्णय भएपनि निर्देशन भने अझै जारी भएको छैन। 

‘मान्युट भएपनि सबैको हस्ताक्षर नहुँदा पूर्णता पाएको छैन, प्रक्रिया पुगेपछि निर्देशन जारी हुन्छ’ राष्ट्र बैंक निकट उच्च अधिकारीले भने। 

सुनको आयातमा कडाइ गरेसँगै आयात पनि घटिरहेको छ। विदेशी मुद्राको सञ्चितिमा दबाब परेपछि कडाइ गरिएपनि अहिले अवस्था सहज भएपछि खुकुलो बनाउनुपर्ने दबाब राष्ट्र बैंकमाथि परेको थियो।