.gif)
.gif)
झापा- मेचीनगर नगरपालिका-१४ को हडिया खोलामा झोलुंगे पुल बनेपछि स्थानीयवासी हर्षित भएका छन्। पुल बनेपछि बर्सातको समयमा आफ्नै वडा कार्यालय पुग्न पाँच किलोमिटर घुमेर जानुपर्ने बाध्यताबाट मुक्त हुन पाएकामा उनीहरू हर्षित भएका हुन्।
वडा नम्बर १४ स्थित पत्रेसिंह बारीका करिब पाँच सय घर परिवारलाई खोलाका कारण दुहागढीमा रहेको विद्यालय तथा वडा कार्यालय पुग्न वडा नंं १० को धुलाबारी हुँदै घुमेर जानुपर्ने बाध्यता थियो। पुल बनेपछि यहाँका बासिन्दा सो समस्याबाट मुक्त भएको वडा नम्बर १४ का वडाध्यक्ष बाबुलाल राजवंशीले बताए।
उनका अनुसार दश मिनेट लाग्ने पाँच सय मिटरको दुरीमा रहेको विद्यालय र वडा कार्यालय पुग्न पत्रासिंहवासीले वर्षायाममा एक घण्टा हिँड्नुपर्थ्यो। संघीय सरकारको एक करोड ३० लाख रूपैयाँको लागतमा १३० मिटर लामो झोलुंगे पुल निर्माण गरिएको हो।
मेचीनगर नगरपालिकाका प्रमुख गोपालचन्द बुढाथोकीले आज उक्त पुल उद्घाटन गरे। वि.संं २०७९ माघमा स्थानीय दुर्गा धमलाको अध्यक्षतामा उपभोक्ता समिति बनाएर पुल निर्माण सुरु गरिएको थियो। समितिले निर्धारित मितिभन्दा दुई महिना अगावै पुल निर्माण गरेको वडाध्यक्ष राजंवशीको भनाइ थियो। रासस
