काठमाडौं- वाणिज्य आपूर्ति तथा उपभोक्ता स‌ंरक्षण विभागले चिनी कालोबजारी गरेको भन्दै कुलेश्वरको गृहेश्वरी ट्रेडलिंकको गोदाम सिल गरेको छ। गोदाममा कृत्रिम भण्डारण गरेर राखिएको र लेबल अस्पष्ट भएको भन्दै विभागले सिल गरेको हो।

गृहेश्वरी ट्रेडलिंकको गोदाममा १४ सय बाेरामा ७० हजार किलो चिनी भण्डारण गरिएको थियो। विभागले उक्त चिनी बरामद गरिसकेको छ। विभागका महानिर्देशक तीर्थराज चिलुवालका अनुसार चिनीको गोदाम सिल गरेर चिनीको गुणस्तर परिक्षणका लागि पठाइएको छ।

गृहेश्वरी ट्रेडलिंकले उद्योगहरूबाट सस्तोमा खरिद गरेको चिनी काठमाडौंमा बिल बिजकबिना नै महँगो मूल्यमा बिक्री गरेको भन्दै विभागमा उजुरी परेको थियो। उजुरीपछि विभागले अनुसन्‍धान अघि बढाएको हो। 

पछिल्लो समय कालोबजारी बढेको र चिनीमा मनपरी मूल्य निर्धारण भइरहेको गुनासो आइरहेकाले विभागले अनुसन्धान तीब्र बनाइरहेको महानिर्देशक चिलुवालले बताएका छन्।