काठमाडौं- सिटिजन्स बैंक इन्टरनेसनलले आर्थिक वर्ष २०७९/८० को नाफाबाट आफ्ना सेयरधनीहरूलाई ५.७९ प्रतिशत लाभांस दिने प्रस्ताव गरेको छ। 

बैंकको सञ्चालक समितिको बैठकले गत वर्षको नाफाबाट चुक्ता पुँजीको ५.७९ प्रतिशतले हुन आउने ८२ करोड २१ लाख ६१ हजार रुपैयाँ लाभांसका लागि छुट्याउने निर्णय गरेको हो। 

सञ्चालक समितिको यो प्रस्ताव सधारणासभाबाट पारित भएर नेपाल राष्ट्र बैंकबाट स्वीकृत भएपछिमात्र लागू हुनेछ। 

सिटिजन्स इन्टरनेशनल बैंकले गत वर्ष करिब साढे २ अर्ब रुपैयाँ नाफा गरेको थियो। बैंकले गत आर्थिक वर्षको चौथो त्रैमाससम्म २ अर्ब २१ करोड ४४ लाख २५ हजार रुपैयाँ खुद नाफा आर्जन गरेको थियो। अघिल्लो वर्षको तुलनामा गत आर्थिक वर्ष बैंकले १०.४१ प्रतिशत बढी नाफा गरेको हो ।

नाफासँगै बैंकको प्रतिसेयर आम्दानी पनि बढेको छ। अघिल्लो आर्थिक वर्षको चौथो त्रैमाससम्म १४ रुपैयाँ १२ पैसा रहेको बैंकको यस्तो आम्दानी, गत आर्थिक वर्षको सोही अवधिसम्ममा १ रुपैयाँ ४७ पैसा बढेर १५ रुपैयाँ ५९ पैसा पुगेको छ। सो अवधिसम्ममा बैंकको मूल्य आम्दानी अनुपात ११.१ प्रतिशत रहेको छ भने प्रतिशेयर नेटवर्थ १५० रुपैयाँ ८ पैसा रहेको छ। 

बैंकको लाभांस क्षमता ७ प्रतिशत रहेको थियो।