काठमाडौं- निजी हवाई सेवा प्रदायक कम्पनी गुण एयरलाइन्सले नियमित आन्तरिक उडानको तयारीलाई तिब्रता दिएको छ। एक वर्ष अगाडिसम्म सिम्रिक एयरलाइन्सको नाममा आन्तरिक उडान गरिरहेको एयरलाइन्सले गुण नाममा परिवर्तन गरेर उडानमा आउन लागेको हो।

एयरलाइन्सले केही समय अगाडि मात्रै यती एयरलाइन्सको ५ वटा जेट स्ट्रिम जहाज खरिद गरेको थियो। एयरलाइन्ससँग अब ७ वटा जहाज भएको छ।

नागरिक उड्डयन प्राधिकरणबाट एओसी लिन काम अन्तिम चरणमा पुगेको एयरलाइन्सले जनाएको छ। अनुमति पाएसँगै भदौ महिनाको अन्तिम  हप्ता देखि नियमित आन्तरिक हवाइ सेवा सुरु गर्ने गरी तयारी पूरा भएको एयरलाइन्सले जनाएको छ।

उडान सञ्चालनको तयारीमा तीब्र रुपमा अगाडि बढेको गुण एयरलाइन्सका प्रवक्ता एवम बजार तथा बिक्री प्रमुख प्रज्वल थापाले बताए।

उडानको सुरुवातमा काठमाडौंबाट पोखरा, भरतपुर र तुम्लिङटार हुने एयरलाइन्सले जनाएको छ। दोस्रो चरणमा सिमरा, भैरहवा,  जनकपुर, नेपालगन्ज र बिराटनगर को लागि उडान तयारी भएको थापाले बताए।