काठमाडौं- जुनसुकै व्यापार व्यवसाय गर्नेले पनि सरकारलाई व्यावसायिक आयकर तिर्नु पर्छ। जसरी रोजगारीमा आयकर लगाउने गरेको छ, सरकरले व्यवसायमा पनि आयकर लगाउँदै आएको छ।
आन्तरिक राजस्व विभागले आर्थिक वर्ष २०७८/०७९ का लागि आयअनुसारको व्यवसाय कर तय गरेको छ। व्यवसाय करमा पनि एकल र दम्पतीको हकमा भनेर वर्गीकरण गरेको छ।
व्यवसाय गरेर वार्षिक ४ लाख रुपैयाँसम्म आम्दानी गर्ने एकल व्यक्ति र ४ लाख ५० हजार रुपैयाँसम्म आम्दानी गर्ने दम्पतीको हकमा भने कर लाग्दैन।
तर एकल व्यक्तिले व्यवसाय गरी वार्षिक ४ लाखभन्दा बढीदेखि ५ लाख रुपैयाँसम्म आम्दानी गर्दा सरकारलाई १० प्रतिशत र दम्पतीको हकमा ४ लाख ५० हजारदेखि ५ लाख ५० हजार रुपैयाँसम्म १० प्रतिशत व्यवसाय आयकर तिर्नु पर्छ।
यसैगरी, एकलको हकमा ५ लाख देखि ७ लाख रुपैयाँको र दम्पतीको हकमा ५ लाख ५० हजार देखि ७ लाख ५० हजार रुपैयाँसम्म २० प्रतिशत व्यावसायिक आयकर तिर्नु पर्छ।
यसैगरी एकलको हकमा ७ लाख देखि २० लाख रुपैयाँसम्म र दम्पतीको हकमा ७ लाख ५० हजारदेखि २० लाख रुपैयाँसम्ममा ३० प्रतिशत हुन आउने कम व्यसायिक आयकर तिर्नु पर्छ। २० लाखभन्दा बढीको आम्दानीमा भने एकल र दम्पती दुबै ३६ प्रतिशत व्यावसायिक आयकर तिर्नु पर्छ।
उदाहरणका लागि व्यवसायबाट वार्षिक २० लाख कमाउनेले कति व्यावसायिक आयकर तिर्ने पर्छ हिसाबमा हेरौँ
एकलको हकमा ४ लाखसम्म कुनै कर लाग्दैन। ४ देखि ५ लाखसम्म १० प्रतिशतका दरले १० हजार, ५ देखि ७ लाख रुपैयाँसम्ममा २० प्रतिशतका दरले ४० हजार, ७ लाखदेखि २० लाख रुपैयाँसम्म ३० प्रतिशतका दरले ३ लाख ९० हजार रुपैयाँ व्यवसाय आयकर तिर्नु पर्छ। यसरी व्यवसायबाट २० लाख रुपैयाँ कमाउनेले वार्षिक ४ लाख ४० हजार रुपैयाँ तिर्नु पर्छ।
दम्पतीको हकमा ४ लाख ५० हजार रुपैयाँसम्म भने व्यावसायिक आयकर लाग्दैन। त्यसपछि ४ लाख ५० हजारदेखि ५ लाख ५० हजार रुपैयाँसम्म १० प्रतिशतका दरले १० हजार, ५ लाख ५० हजारदेखि ७ लाख ५० हजार रुपैयाँसम्म २० प्रतिशतका दरले ४० हजार र ७ लाख ५० हजार रुपैयाँदेखि २० लाख रुपैयाँसम्म ३० प्रतिशतका दरले ३ लाख ७५ हजार रुपैयाँ व्यवसाय आयकर तिर्नु पर्छ। यसरी व्यवसायबाट वार्षिक २० लाख कमाउँदा व्यावसायिक आयकरमार्फत ४ लाख २५ हजार रुपैयाँ सरकारलाई तिर्नु पर्छ।
