काठमाडौं- वाणिज्य बैंकहरूले मंसिर महिनाको ब्याजदर सार्वजनिक गरेका छन्। राष्ट्र बैंकले हस्तक्षेप नै गरेर ब्याज बढाउन सकिने अधिकतम् सीमा तोकिदिएपछि २४ वटा बैंकले ब्याजदर वृद्धि गरेका हुन्।
२४ वाणिज्य बैंकले मंसिर १ बाट लागु हुने गरि ब्याजदर सीमा अधिकतम् १०.०५ प्रतिशत निर्धारण गरेका हुन्। सरकारी स्वामित्वका नेपाल बैंक र कृषि विकास बैंकले समेत ब्याज बढाएका छन्।
तीन वटा वाणिज्य बैंकले भने अधिकतम् सीमासम्म ब्याज बढाएका छैनन्। सरकारी स्वामित्वको राष्ट्रिय वाणिज्य बैंक, स्ट्यान्डर्ड चार्टर्ड बैंक र निजी क्षेत्रको बैंक मेगाले १०.०५ प्रतिशतभन्दा कम नै ब्याजदर तोकेका छन्।
मंसिर महिनाका लागि राष्ट्रिय वाणिज्य बैंकले सर्वसाधारणलाई दिने ब्याज ९.११ प्रतिशत हुने गरि तोकेको छ। त्यस्तै स्ट्यान्डर्ड चार्टर्ड बैंकले ९.५० प्रतिशत र मेगा बैंकले ९.९६ प्रतिशत ब्याज निर्धारण गरेको छ।
