शुक्रबार, साउन ४ गते २०८१    
images
images
images

व्यावसायिक कृषिमा पूर्ववडाध्यक्ष : सुन्तला, अलैँची खेतीदेखि बंगुरपालनमा लगानी

images
बुधबार, साउन १७ २०८०
images
images
व्यावसायिक कृषिमा पूर्ववडाध्यक्ष : सुन्तला, अलैँची खेतीदेखि बंगुरपालनमा लगानी

पूर्ववडाध्यक्ष नेत्रबहादुर बुढाथोकीले पाँच रोपनी धान खेतमा सुन्तला खेती गर्दै आएका छन्। धान खेतीभन्दा तेबर नाफा हुने उनको भनाइ छ।

images

गलकोट- बागलुङको गलकोट नगरपालिका-१ दुदिलाभाटीका नेत्रबहादुर बुढाथोकी यतिबेला अलैँची स्याहारसुसार गर्नमा व्यस्त छन्। सुन्तला खेतीबाट व्यावसायिक कृषि पेसा थालेका बुढाथोकी क्रमशः अलैँची खेती, बंगुरपालन र तरकारी खेतीमा लागेका मात्रै छैनन्, आफ्नो वडामा व्यावसायिक कृषक जन्माउन उनको ठूलो हातसमेत छ।

images
images

विसं २०६८ मै दुई सय सुन्तलाका बिरुवा लगाएर सुन्तला खेती थालेका बुढाथोकीलाई परिवारले धान खाने खेत मासेर रुख रोपेको भन्दै गालीसमेत गरे। अहिले वर्षमा सुन्तला खेतीबाटै झन्डै तीन लाख रूपैयाँ कमाइ भएर धान खेतीभन्दा तेबर नाफा भएपछि परिवारका व्यक्तिसमेत बुढाथोकीको कृषि कर्मलाई सघाउनतर्फ लागे।

images

गलकोटकै बढी व्यावसायिक कृषक रहेको दुदिलाभाटीमा किसानलाई व्यावसायिक बनाउन थालेका बुढाथोकीले किसानकै मनमा बसेको र जनतामा परिचित भइसकेको पत्तै पाएनन्। फलस्वरुप २०७४ सालको स्थानीय तहको निर्वाचनमा गलकोट-१ को वडाध्यक्ष निर्वाचित भएका थिए।

images

'विसं २०६८ मा कृषि विकास कार्यालयमार्फत १५ रूपैयाँका दरले दुई सय सुन्तलाका बिरुवा पाँच रोपनी धान फल्ने खेतमा लगाएको थिएँ, ५० बिरुवा मरे, अहिले एक सय ५० बिरुवाले उत्पादन दिइराखेका छन्, गत वर्षमात्रै सुन्तला बिक्री गरेर तीन लाख रूपैयाँ कमाएको थिएँ', बुढाथोकीले भने, 'सुन्तलासँगै व्यावसायिक तरकारी र अलैँची खेतीको सम्भावना देखेर स्थानीयलाई व्यावसायिक उत्पादनमा लगाउन थालेपछि जनतासँग नजिक भइयो, २०७४ सालमा वडाध्यक्षमा निर्वाचित भएपछि नगरपालिका र वडाको बजेट समेत कृषिमा केन्द्रित गरेँ, अहिले यस वडामा आलु पकेट, बाख्रा पकेट, अलैँची ब्लक र किबी पकेटका कार्यक्रम सञ्चालित छन्।'

बुढाथोकीले सुन्तलाको आम्दानी बढे पनि अलैँची, तरकारी र बंगुरपालन नयाँ भएकाले लगानीमै रहेको जानकारी दिए। सुसंगम फलफूल तथा पशुपालन केन्द्र नामको फार्म दर्ता गरेका बुढाथोकीले पाँच रोपनी धान खेतमा सुन्तला खेती गर्दै आएका छन्। उनले घुसुवा बालीका रूपमा सोही क्षेत्रफलमा अलैँची खेती समेत गर्दै आएका छन्।

'सुरुमा सुन्तलाका बिरुवा लिएर रोप्न खोज्दा बुवाले दिनुभएन, अनि मकै लगाएर बीचमा सुन्तला लगाएँ', उनले भने, 'धान खेतको लगानीबाट भन्दा सुन्तला खेतीबाट तेबर कमाउन सकिन्छ, मेरो परिवारले मात्रै होइन सबै किसानले बुझिसकेका छन्, अहिले बागलुङमा ठूलो आम्दानीको रूपमा सुन्तला खेती छ।'

गत वर्ष २८ क्विन्टल सुन्तला एक सय रूपैयाँभन्दा माथिल्लो भाउमा घरबाटै बिक्री गरेको बुढाथोकीको भनाइ छ। आफ्नै वडाध्यक्षको कार्यकालमा वडामा अलैँची ब्लक क्षेत्र कार्यक्रम स्थापना भएपछि आफूसमेत पुनः अलैँची खेतीमा लागेको उनको भनाइ छ। अहिले दुदिलाभाटीमै अलैँची बिक्रीबाट एकै किसानले वर्षमा पाँच लाख रूपैयाँदेखि सात लाख रूपैयाँसम्मको आम्दानी गरिरहेको बुढाथोकीले जानकारी दिए।

उनले कृषि ज्ञान केन्द्रको सहयोगमा चार लाख रूपैयाँ लागतमा एउटा हाइटेक टनेल स्थापना गरेर व्यावसायिक तरकारी खेती गर्दै आएका छन्। कृषिमा प्राप्त सफलतापछि बुढाथोकीले पशुपालनमा आकर्षित भएर १० लाख रूपैयाँ लगानीमा तीन वर्षदेखि बंगुर फार्मसमेत सञ्चालनमा ल्याएका छन्।

बुढाथोकीको बंगुर फार्ममा अहिले साना-ठूला १८ बंगुर रहेका छन्। चार सय रूपैयाँ प्रतिकिलोमा स्थानीय हटिया, नरेठाँटीलगायतका बजारमा बंगुरको मासु बिक्री हुने गरेको छ। तीन माउ राखेर सुरु गरेको बंगुरपालन व्यवसाय फस्टाउँदै गएको र १० लाख रूपैयाँ लगानी केही वर्षमै उठ्ने उनको विश्वास छ। विसं २०७४ को स्थानीय निर्वाचनमा वडाध्यक्ष हुनुभन्दा पहिलासमेत कृषिमै भएकाले जनप्रतिनिधि भइसकेपछि समेत पुरानै अवस्थामा फर्किएको उनको भनाइ छ।

आफ्नो वडाध्यक्षको कार्यकालमा कृषिमा बजेट बढाउने, कृषि भ्रमण गराउने, वडामा किबी पकेट कार्यक्रम लागु गर्नेलगायतका काम गरेको उनको भनाइ छ। अहिले दुदिलाभाटीमा किबीको मात्रै पाँच हजार बिरुवा लगाइएको जानकारी दिए।

कृषि र पशुपालनबाट बचत भएको समयमा बुढाथोकी सामाजिक कामसँगै राजनीतिमा समेत सक्रिय रहँदै आएका छन्। पूर्ववडाध्यक्ष रहेका बुढाथोकी राष्ट्रिय जनमोर्चा बागलुङको जिल्ला सदस्य छन्।

राजनीति र जनप्रतिनिधि भनेको पेसा नभएर सेवा भएकाले आर्थिक जीवनस्तर उकास्न र अरुलाई उदाहरणीय बन्नका लागि आफू कृषि तथा पशुपालनमा लागेको उनको भनाइ छ। 'अहिले जनप्रतिनिधलाई जागिरका रूपमा लिने प्रचलन छ, त्यस्तो होइन, जनप्रतिनिधि हुनुभन्दा पहिला किसान थिएँ, अहिले पनि किसान छु, जनप्रतिनिधि भएर अरुलाई यो गर त्यो गरभन्दा आफूले पनि त केही गरेर देखाउनपर्यो', उनले भने।

बुढाथोकीको घर फार्म नजिकै कृषि निर्देशनालयको १० लाख रूपैयाँको लागतमा कृषि उपज संकलन केन्द्रसमेत निर्माण गरिएको छ। रासस 


प्रकाशित : बुधबार, साउन १७ २०८०१०:३८

प्रतिक्रिया दिनुहोस
कार्यकारी सम्पादक

केदार दाहाल

सूचना तथा प्रसारण विभाग दर्ता नम्बर

२८३८/०७८-७९

© 2024 All right reserved to biznessnews.com  | Site By : SobizTrend