काठमाडौं- ग्लोबल मोबिलिटी र अर्बन सर्भिस प्लेटफर्म इनड्राइभका संस्थापक (फाउण्डर) तथा सीईओ  आर्सेन टम्स्कीको ‘इन ड्राइभरः साइबेरियादेखि सिलिकन भ्यालीसम्म’ नामक पुस्तक नेपाली भाषामा पनि सार्वजनिक गरिएको छ ।

 नेपाली भाषाको पहिलो संस्करणको उक्त पुस्तक आज काठमाडौँमा आयोजित पत्रकार सम्मेलनमा लोकापर्ण गरिएको हो । यो पुस्तक अब अङ्ग्रेजी, स्पेनिश, पोर्चुगिज भाषापछि नेपालीमा उपलब्ध भएको छ ।

इन ड्राइभरका प्रमुख कार्यकारी अधिकृत (सिइओ) समेत रहेका टम्स्कीले पाठक सामु आफ्नो यात्रा अनुभव साझा गर्न पाउँदा खुसी भएको बताए। 

‘इन ड्राइभरको जग र विकास मेरो लागि व्यावसायिक प्रयास मात्र होइन, एउटा गहिरो व्यक्तिगत र भावानात्मक यात्रा पनि हो जसले मेरो जीवनलाई आकार दिएको छ’ उनले भने। 

पुस्तकले आर्सेनको जीवन कथालाई अनावरण गरेको छ । साइबेरियामा जीवनको कठोर वास्तविकता ‘नेभिगेट’ गर्नेदेखि दृढ आत्मविश्वासका साथ प्राविधिक उद्यमशीलताको क्षेत्रमा प्रवेश गर्ने विषय समावेश छन् । प्रविधि आविष्कारको केन्द्रविन्दु, अवसर दुर्लभ देखिने याकुतियामा भएको विनम्र सुरुआतदेखि सिलिकन भ्यालीसम्म अर्सेनको जीवन कथा लगनशीलता, सामूहिक भावनायुक्त कार्य र नवप्रवर्तनको शक्तिको लागि प्रेरणादायी प्रमाण भएको उल्लेख गरिएको छ । इन ड्राइभरले ४० भन्दा बढी देशहरुमा सेवा सञ्चालन छ।

आर्सेन टम्स्की याकुटियाका एक टेक उद्यमी हुन जसले इनड्राइभको स्थापना गरे, जुन अग्रणी विश्वव्यापी राइड-हेलिङ र गतिशीलता प्लेटफर्महरू मध्ये एक भएको छ। आर्सेनको यात्रा एक सफ्टवेयर इन्जिनियरको रूपमा सुरु भयो र बिस्तारै उद्यमशीलतामा सरेका थिए। पूर्वी साइबेरियाको दुर्गम शहरको कठिन परिस्थितिमा काम गर्दै, उनले आफ्नै व्यवसाय विकास विधि र विचारधाराको विकास गरे।