काठमाडौं- ललिता निवासको जग्गा हिनामिना प्रकरणमा थप दुई जना पक्राउ परेका छन्। 

ललिता निवासको सरकारी जग्गा विभिन्न व्यक्तिका नाममा पास गराउने कार्यमा संलग्न रहेको आरोपमा केन्द्रीय अनुसन्धान ब्युरो (सीआईबी) ले सोमबार सकुलानन्द महर्जन र सञ्जयकुमार महर्जनलाई पक्राउ गरेको एसएसपी दिनेश आचार्यले जानकारी दिए।

थप दुई जना पक्राउ परेसँगै यो प्रकरणमा पक्राउ पर्नेको संख्या २१ पुगेको छ। यस प्रकरणमा जोडिएका पूर्व निर्वाचन आयुक्त सुधीरकुमार शाह, भाटभटेनी सुपर मार्केटका सञ्चालक मीनबहादुर गुरुङ, सञ्चार तथा सूचना प्रविधि मन्त्रालयका सचिव कृष्ण बहादुर राउतलगायत हालसम्म १९ जना पक्राउ परिसकेका छन्। पक्राउ परेका सबै सीआईबीको हिरासतमा छन्। 

ललितानिवासको सरकारी जग्गा व्यक्तिको नाममा नामसारी गरी अनियमितता गरेका भन्दै सीआईबीले सरकारी छापा, दस्तखत, कागजात किर्ते मुद्दामा अनुसन्धान गरिरहेको छ।

ललितानिवासको एक सय ४३ रोपनी जग्गाको जग्गाधनी गृह मन्त्रालय मातहतको समरजंग कम्पनी थियो। तर दर्ता स्रेस्ता सच्याएर उक्त जग्गा विभिन्न गुठी र व्यक्तिको नाममा नामसारी गरेर अनियमितता गरेको प्रहरीको दाबी छ।