काठमाडौं- ललिता निवास जग्गा हिनामिना प्रकरणमा थप एक जना पक्राउ परेका छन्।
ललिता निवासको सरकारी जग्गा विभिन्न व्यक्तिका नाममा नामसारी गर्ने कार्यमा जोडिएका आरोपमा नापी कार्यलयका पूर्वकर्मचारी अरुणकुमार श्रेष्ठ पक्राउ परेका हुन्। प्रहरीको केन्द्रीय अनुसन्धान ब्यूरो (सीआईबी) ले आइतबार श्रेष्ठलाई पक्राउ गरेको एसएसपी दिनेश आचार्यले जानकारी दिए।
यस प्रकरणमा जोडिएका पूर्व निर्वाचन आयुक्त सुधीरकुमार शाह, भाटभटेनी सुपर मार्केटका सञ्चालक मीनबहादुर गुरुङ, सञ्चार तथा सूचना प्रविधि मन्त्रालयका सचिव कृष्ण बहादुर राउतलगायत हालसम्म १९ जना पक्राउ परिसकेका छन्।
ललितानिवासको सरकारी जग्गा व्यक्तिको नाममा नामसारी गरी अनियमितता गरेका भन्दै सीआईबीले सरकारी छापा, दस्तखत, कागजात किर्ते मुद्दामा अनुसन्धान गरिरहेको छ।
ललितानिवासको एक सय ४३ रोपनी जग्गाको जग्गाधनी गृह मन्त्रालय मातहतको समरजंग कम्पनी थियो। तर दर्ता स्रेस्ता सच्याएर उक्त जग्गा विभिन्न गुठी र व्यक्तिको नाममा नामसारी गरेर अनियमितता गरेको प्रहरीको दाबी छ।