काठमाडौं- वाणिज्य बैंकहरूले आर्थिक वर्ष २०७९/८० मा ५ खर्ब २५ अर्ब निक्षेप संकलन गरेका छन्। आर्थिक वर्ष २०७८/७९ मा ३ खर्ब ४० अर्बमात्रै निक्षेप संकलन गरेको थियो। निक्षेप बढ्दा गएको आर्थिक वर्षमा कर्जा विस्तार भने सुस्त देखिएको छ। 

२०७८/७९ मा ४ खर्ब ५४ अर्ब कर्जा प्रवाह हुँदा २०७९/८० मा १ खर्ब १९ अर्बमात्रै कर्जा प्रवाह भएको छ। २०७८/७९ मा असार मसान्तसम्म वाणिज्य बैंकहरूको निक्षेप ४५ खर्ब ४१ अर्ब पुगेकोमा २०७९/८० मा बढेर ५० खर्ब ६६ अर्ब पुगेको छ। जुन २०७८/७९ को भन्दा ५ खर्ब २५ अर्बले बढेको हो। यता ऋण विस्तार भने २०७८/७९ मा ४१ खर्ब ७५ अर्ब रहेकोमा २०७९/८० मा १ खर्ब १९ अर्बमात्रै थपिएर ४२ खर्ब ९४ अर्ब रुपैयाँ पुगेको छ। 

अधिक तरलताले अन्तरबैंक ब्याजदर २०७९/८० मा ०.४७ प्रतिशतमा झरेको छ। जब कि २०७८/७९ को असार मसान्तमा ८.५ प्रतिशतसम्म पुगेको थियो। २०७८/७९ मा बैंकहरूलाई निक्षेप-ऋण (सीडी) रेसियो ९० मा मिलाउन हम्मे हम्मे परेको थियो। कतिपय बैंकहरू राष्ट्र बैंकको कारबाहीमा समेत परेको थिए। तर २०७९/८० को असार मसान्तमा सीडी रेसियो घटेर ८१.६२ प्रतिशतमा झरेको छ। अहिले बैंकहरूको ऋण लगानी गर्न सक्ने क्षमता झन्डै ५ खर्ब पुगेको छ। 

तरलता बढी हुँदा मुद्रा बजारको ब्याज पनि घटेको छ। वर्षकै न्यून अंकमा ट्रेजरी बिलको ब्याज आएको छ। राष्ट्र बैंकका अनुसार २८ दिने ट्रेजरी बिलको ब्याज ४.१६ प्रतिशत छ भने ९१ दिनेको ५.१८ प्रतिशत छ।

नेपाल राष्ट्र बैंकका अनुसार समग्र वित्तीय प्रणालीमा ५७ खर्ब ४० अर्ब निक्षेप पुगेको छ भने ऋण प्रवाह ४८ खर्ब ५५ अर्ब पुगेको छ।