काठमाडौं- बैंकिङ प्रणालीमा ऋण दिन मिल्ने रकम(तरलता)को चरम अभाव भइरहेको समयमा सरकारले ६ अर्ब १० करोड आन्तरिक ऋण उठाउन लागेको छ।
नेपाल राष्ट्र बैंकले ६ अर्ब १० करोड बराबरको ट्रेजरी बिल बिक्री मार्फत् आन्तरिक अल्पकालीन ऋण उठाउन लागेको छ।
केन्द्रीय बैंकले ९१ दिन अवधिको १० करोड र १८२ दिन अवधिको ६ अर्ब गरी कूल ६ अर्ब १० करोडको ट्रेजरी बिल आज बोलकबोल गर्न लागेको हो।
राष्ट्र बैंकका अनुसार ९१ दिने ट्रेजरी बिल आगामी माघ २५ गते परिपक्व हुनेछ भने १८३ दिने ट्रेजरी बिल २०७९ वैशाख २७ मा परिपक्व हुनेछ । यसअघि यही कात्तिक १५ मा बैंकले एक अर्ब ६६ करोडको ट्रेजरी बिल बिक्री गरेको थियो ।
ऋणपत्रको बोलकबोल अनलाइन मार्फत् आज दिउँसो २ बजे खुला हुने राष्ट्र बैंकले जनाएको छ । बोलकबोलमा सहभागी हुने क, ख र ग वर्गका बैंक, अन्य वित्तीय संस्था, गैह्रबैंक तथा वित्तीय संस्थालगायतमध्ये सर्वाधिक अङ्ग कबोल गर्नेलाई राष्ट्र बैंकले मङ्गलबार ट्रेजरी बिल जारी गर्नेछ ।
राष्ट्र बैंकले सरकारलाई आवश्यक पर्ने अल्पकालीन ऋण उठाउन बोलकबोल प्रक्रियामार्फत प्रत्येक हप्ता यस्ता ऋणपत्र बिक्री गर्दछ। रासस
