काठमाडौं- पछिल्लो केही समययता निरन्तर उकालो लागेको सेयर बजार आज पनि सामान्य अंकले बढेको छ।
साताको अन्तिम कारोबारमा बिहीबार ५ अंकले बढेर बजार २०४२.०७ बिन्दुमा पुगेको छ। ७५ कम्पनीको सेयर मूल्य बढेको बजारमा ३ अर्ब १६ करोड २८ लाख १० हजार रूपैयाँको कारोबार भएको छ।
बुधबार १६.४२ अंकले बढेर २०३७.०६ बिन्दुमा पुगेको बजारमा ५ अर्ब १ करोड रूपैयाँको कारोबार भएको थियो। बिहीबार भने बजार बढे पनि कारोबार रकम भने घटेको छ।
यो साता नै सेयर बजारमा लगातार चार कारोबार वृद्धितर्फ देखिएको छ। सरकार लगानीकर्ताको पक्षमा रहेको र पुँजी बजारको समग्र हितमा काम गर्ने अर्थमन्त्रीको घोषणासँगै विश्वस्त बनिरहेका लगानीकर्ता हौसिएका छन्।
यो साता आइतबार ४०.४८ अंकले बढेर १९८०.०९ बिन्दुमा पुगेको बजार सोमबार ७.७९ अंकले बढेको थियो। मंगलबार ३४.१७ अंकले बढेर २०२०.६४ बिन्दुमा पुगेको बजारमा बुधबार पनि राम्रो वृद्धि देखिएको हो।
आउँदो आर्थिक वर्षको बजेटमा नै पनि पुँजी बजार पारदर्शी, प्रतिस्पर्धी बनाएर लगानीकर्ताको हित सुनिश्चित गर्ने घोषणाबीच मौद्रिक नीतिको पर्खाइमा रहेका लगानीकर्ता साथ मिल्ने आशमा देखिएका छन्। स्थायी सुधारको आधार पर्खिरहेका लगानीकर्ता मौद्रिक नीतिमार्फत हुने व्यवस्थाको पर्खाइमा छन्। अहिलेको अवस्थामा संगठित लगानीकर्ताहरू बजारको स्थायी सुधारका आधार स्पष्ट हुनुपर्ने बताउँदै आइरहेका छन्।
