काठमाडौं- विशेष अदालतले कर फर्छ्यौट आयोग र आयोगका सदस्यसचिव भइ काम गरेका सहसचिव चुडामणी शर्मासहित तीनजना विरूद्ध राजस्व चुहावटको छुट्टाछुट्टै दुई मुद्दामा कसुर ठहर गरेको छ। उनीहरूविरुद्ध सजाय निर्धारण भने हुन बाँकी छ। 

चुडामणीसहित उनकी श्रीमती कल्पना उप्रेतीविरूद्धको गैरकानूनी सम्पत्ति आर्जनमा भने अदालतले सफाइ दिएको छ। 

न्यायाधीशहरू श्रीकान्त पौडेल, यमुना भट्टराई र शालिग्राम कोइरालाको संयुक्त इजलासले बिहीबार फैसला सुनाएको हो। 

अख्तियारले कर फर्छ्योट आयोगका अध्यक्ष लुम्बध्वज महत, सदस्य उमेश ढकाल र सदस्यसचिव तथा आन्तरिक राजस्व विभागका तत्कालीन महानिर्देशक चुडामणी शर्माविरुद्ध राजस्व निर्धारणमा अनियमितता गरेको भन्दै मुद्दा दायर गरेको थियो। अख्तियारले तीनै पदाधिकारीविरुद्ध २०७४ साउन १ गते १० अर्ब ९६ करोड रूपैयाँको बिगो मागदावीसहित विशेष अदालतमा मुद्दा दायर गरेको थियो। 

३० अर्ब ५२ करोड रूपैयाँको राजस्व फस्यौट गर्दा ९ अर्ब ५४ करोड रूपैयाँमात्रै राज्यकोषमा दाखिला भइ अरु रकम अनियमित ढंगले मिनाहा भएको घटना बाहिरिएसँगै अख्तियारले अनुसन्धान थालेको थियो। 

२०७८ साउन ९ गते दायर भएको राजस्व चुहावटको दोस्रो मुद्दामा १ अर्ब ३३ लाख २० हजार ३ सय ८५ रूपैयाँ बिगो मागदावीसहित विशेष अदालतमा मुद्दा दायर गरेको थियो। 

यस्तै शर्मा र उनकी श्रीमती कल्पना उप्रेतीविरूद्ध ४ करोड २९ लाख रूपैयाँ गैरकानूनी सम्पत्ति आर्जन गरेको अभियोग थियो। जसमा विशेष अदालतले सफाइ दिएको छ।