काठमाडौं- महालेखा परीक्षक टंकमणि शर्मा कार्यकाल सकिएर बिदा भएका छन्। छ वर्षे कार्याकाल पूरा भएपछि आइतबारदेखि शर्मा बिदा भएका हुन्। शर्मा बिदा भएसँगै संवैधानिक निकाय महालेखा परीक्षकको कार्यालय नेतृत्वविहीन भएको छ। 

संवैधानिक व्यवस्थाअनुसार महालेखा परीक्षक नियुक्ति नहुँदा नेतृत्वविहीन भएको हो। संविधानअनुसार महालेखा परीक्षकसहितका संवैधानिक प्रमुखको पद रिक्त हुनुभन्दा एक महिना पहिले नै नियुक्त गर्नुपर्ने व्यवस्था रहेको छ। 

संविधानको धारा २८४ को ३ को व्यवस्थाअनुसार संवैधानिक परिषदले न्यायाधीश वा संवैधानिक निकायका कुनै प्रमुख वा पदाधिकारीको पद रिक्त हुनुभन्दा एक महिनाअगावै नियुक्तिका लागि सिफारिस गर्नुपर्ने व्यवस्था छ। 

परिषदको सिफारिसको आधारमा राष्ट्रपतिले नियुक्त गर्नुपर्छ। परिषदको सिफारिसपछि संसदीय सुनुवाइ हुँदै राष्ट्रपतिले नियुक्त गर्ने व्यवस्था रहेको छ। 

संविधानमा प्रष्ट रुपमा एक महिनअअघि नै नियुक्त गर्नुपर्ने भन्दै गरेको व्यवस्थाको उल्लंघन गर्दै सरकारले महालेखा परीक्षक नियुक्तिको प्रक्रियासमेत सुरु गरेको छैन।

छ वर्षको कार्यकाल हुने महालेखा परीक्षकका लागि संविधानमा योग्याता निर्धारण गरिएको छ। 

व्यवस्थापन, वाणिज्यशास्त्र वा लेखामा स्नातक उपाधि प्राप्त गरी वा चार्टर्ड एकाउन्टेन्सी परीक्षा उत्तीर्ण गरी नेपाल सरकारको विशिष्ट श्रेणीको पदमा काम गरेको वा लेखा परीक्षणसम्बन्धी काममा कम्तीमा बीस वर्ष अनुभव भएको प्राथमिकता योग्यता रहेको छ। 

त्यस्तै राजनीतिक दलको सदस्यमा बहाल नरहेको, ४५ वर्ष उमेर पार गरेको जस्ता योग्याता चाहिन्छ।